熱刺主場趕絕「小強」

猪拉多纳

31/01/2012
文： 車車

剛過去周末，英超讓路畀足總盃，所以今、明兩晚即刻開快車補數，而由二月開始，歐聯、歐霸淘汰賽亦開動，賽程密麻麻，真係戥啲要分心幾線參戰嘅球隊擔心，好似曼市雙雄、車路士、阿仙奴！開講有話：「鷸蚌相爭，漁人得利」，咁得利嗰隊有冇熱刺份呢？


今晚熱刺就會喺主場對韋根（有線203及303台周三凌晨3時45分直播），呢條「刺」今季英超主場，除咗季初對曼城輸波之外，打後就連續十場不敗。幫手創造呢八勝二和佳績嘅人，除咗迪科爾同加里夫巴利一對「孖寶兄弟」外，梗係唔少得艾朗連儂同雲達華治啦！熱刺雖然下場要作客利物浦，但近期戰況穩定，亦冇歐洲賽後顧之憂，反而榜首曼市雙雄嚟緊要降格轉戰歐霸，呢回熱刺主場梗係要攞晒三分啦！

韋根＝英超曱甴

韋根雖然好似曱甴咁生命力頑強，經常護級成功，今季喺主場都叫做頂得住吓，曾經死捱爛捱攔過車路士同利物浦，不過近況認真麻麻已經連續八場冇贏過㗎喇！仲有佢哋一作客就打回原形，今季作客曼城輸三球，對曼聯輸五球！講真，對曼市雙雄都食蛋而回，今晚對住狀態一流殺得性起嘅熱刺，我真係搵唔到理由唔撐「讓球主勝」同入球大囉！新正頭畀多個貼士你啦，不妨考慮買埋啲零字尾嘅波膽囉！


車車推介 熱刺 Vs 韋根 讓球主勝、入球大