捧皇馬「大」富大貴

猪拉多纳

22/01/2012
文： 走肖

今日年廿九，行完花市食埋湯丸，凌晨仲有西甲陪大家賀龍年。皇家馬德里今晚喺主場對畢爾包，「龍仔」奧爾斯預料會踢番正選，提供彈藥畀C朗入波，撞啱畢爾包中鋒洛蘭迪要騷哥利，證明莫連奴唔買佢係錯誤，呢場擺明對攻格局，入球大細中位數開到3.5球都要追1.88倍大！（now632台及廣東體育周一凌晨4:30直播）




報道話比比踩美斯被罰內部停賽，加上迪馬利亞同基迪拉未好番，卡卡狀態唔掂檔，如無意外，自爆當教練莫連奴契爺嘅奧斯爾，今場會重返正選陣容，協助C朗、賓施馬同希古恩入波。巧合嘅係，88年出世嘅奧斯爾係「龍仔」，為咗避免龍年坐冷板，相信佢會把握機會，入波助攻做番齣好戲。


畢爾包洛蘭迪向寸王宣戰


現時皇馬只係領先巴塞5分，隨住西班牙盃8強首回合輸咗畀對方，相信莫連奴會更着緊喺聯賽搶分。更何況，今季皇馬喺巴拿貝球場踢15場，當中有12場至少有4個入球出現，呢場用創造型嘅奧爾斯代替茅柴比比打正選，火力更加強，加上皇馬近年積極開拓中國市場，點捨得令捱夜睇波嘅國內球迷失望？




另一方面，畢爾包中鋒洛蘭迪原本被皇馬主席皮里茲睇中，可惜莫連奴對佢冇興趣，導致轉會唔成功，當事人洛蘭迪有機會向寸王宣戰，肯定唔會Hea踢，唔好忘記，兩隊近5次對賽洛蘭迪入3球，1米95「空霸」打法恰到皇馬後防，而且畢爾包有左閘奧爾迪尼斯停賽，對攻好易開入球騷。


橫數千軍


 皇馬主場場均入5粒




‧連盃賽近22場有20勝2負，2次輸波都係不敵巴塞。

‧今季主場15戰，平均每場入5.2球。

 畢爾包對賽未贏過

‧對上7次作客皇馬全敗。

‧近7場未試過落後，3次領先、4次打和。