非洲國家盃周日凌晨開打！

猪拉多纳

20/01/2012

2012年非洲國家盃周日凌晨開打！非洲嘅足球水平近十幾年大大提升，唔少球星更加喺歐洲球壇賺緊天文數字薪酬，同一眾歐美巨星並駕齊驅。今屆非國盃會由赤道畿內亞同加蓬聯合主辦，勢必係連場大戰，注定係不一樣嘅非洲盃！


今屆非國盃風起雲湧，由外圍賽開始已經出現連番驚人賽果，竟然令到埃及、喀麥隆、尼日利亞同南非四大重量級勁旅出局！雖然「名牌」缺席，但隨住非洲各地足球水平提升，唔少國家隊都有具分量嘅猛將壓陣，力圖推翻舊勢力嘅壟斷。

科特迪瓦 加納眾矢之的

喺四大傳統強國冇份參加嘅情況下，加納同科特迪瓦無疑成為眾矢之的，加納雖然有王牌中場艾辛因重傷未必趕得切參與，不過馬賽嘅阿休兄弟已經可以獨當一面，加上基恩、蒙達利、卡華禾艾沙姆等大將，實力相當強勁。


如果講班底，就肯定以科特迪瓦最豪華，嚟自英超嘅杜奧巴、謝雲奴、高路托尼、耶耶托尼、沙洛文卡勞個個身價不菲，絕對係非國盃首屆一指嘅富豪球隊。不過，非洲足球人才輩出，摩洛哥嘅查馬克、馬里嘅施度基達、塞內加爾嘅丹巴巴亞等巨星都想爭做非洲之王，今屆非國盃保證精彩。