AC氹老闆讓球勝好路

猪拉多纳

18/01/2012


意大利盃十六強ＡＣ米蘭主場對路華拿。近年ＡＣ米蘭好少喺本土盃賽交出好成績，最近一次捧盃已經係○二至○三年球季。不過今季有所不同，事關老闆貝魯斯干尼自從退任國家總理之後，有更多時間去打理球會事務，對於球隊成績亦變得着緊，依家老闆日日（目及）到實，教練阿里基又點敢自作主張話放棄盃賽。難得今次遇到大魚腩路華拿，ＡＣ當然要贏得漂亮，巨高料開出「讓球主勝」機會甚高。（周四凌晨４時開賽）


路華拿護級大過天


剛於周一凌晨舉行嘅米蘭打吡，ＡＣ以○比一不敵國際米蘭，賽後貝老闆塊面口仲黑過包公。要知道教練阿里基最近先至加薪續約，打吡之失實在令佢相當尷尬，為令貝老闆條氣順番，今場意盃可謂不容有失。對手路華拿實力偏弱，好難同ＡＣ抗衡，況且路華拿要專心護級，當然唔想畀盃賽影響到往後部署，話唔定會當例行公事咁踢。




主客雙方無論實力及鬥志都有好大差距，睇怕今場都幾難出現冷門賽果，除咗偏熱嘅ＡＣ「讓球主勝」要得過之外，波膽可留意「紅黑兵團」主勝二比○及三比○。