伯明翰重賽過到關

猪拉多纳

18/01/2012
文： 樂比堅尼

英格蘭足總盃第三圈重賽，英超狼隊主場迎戰英冠伯明翰。狼隊護級至上，領隊麥卡菲坦言對盃賽冇乜興趣，重賽增加球員負擔，已令佢牙痛咁聲，今仗對伯明翰隨時留有一手，唔好影響聯賽搶分大計，咁嘅心態隨時畀盃賽殺手伯明翰偷雞成功，樂比仔捧受讓嘅「讓球客勝」。（now 670周四凌晨4時直播）




狼隊目前排英超尾五，護級仲係危危乎，領隊麥卡菲承受嘅壓力相當大，熟悉佢嘅朋友都知道，佢向來唔係咁重視盃賽，因為如果護唔到級，球會損失之大就算捧番個盃仔都補唔番數，所以麥卡菲寧願聯賽踢好啲，都好過喺盃賽逞強。


攻力疲弱難讓阿伯


睇番狼隊上次作客伯明翰，領隊麥卡菲都收起部分主力，成場波狼隊都陷於苦戰，除咗控球指數唔及對手，成場波射中目標都係得四次，遠少於伯明翰嘅九次，雖然狼隊今仗有主場之利，但佢哋攻力一向疲弱，創造力不足，要強攻伯明翰亦冇乜本錢。




伯明翰雖然係英冠球隊，但佢哋踢盃賽有一手，上屆英聯盃奪得冠軍，今季喺歐霸亦踢得唔錯，分組賽未能出線有啲可惜，足總盃相信亦難唔到佢哋，今仗對住無心戀戰嘅狼隊絕對有力突圍！