曼城翻生變走韋根

猪拉多纳

16/01/2012
文： 朱楓

曼城近排係咁輸，好多人都開始質疑佢哋嘅實力，不過朱楓認為「藍月亮」今晚英超作客韋根，可以贏波打番場漂亮勝仗，皆因大魔術「施」大衞施華已經傷愈可以候命，有佢指揮中場，要變走韋根全取3分話咁易啦，1.93倍「讓球客勝」值捧！（有線200及300、廣東體育周二凌晨4:00直播）




助攻王大衞施華傷愈




季初近乎無敵嘅曼城，近排戰績大跌，接連喺盃賽輸波，但其實兩場都輸得唔係好抵，特別對曼聯一仗，無端端一開波就有中堅高柏尼被逐，賽後仲要罰佢停賽4場。




曼城今場繼續有托尼兄弟因為踢非國盃缺陣，前鋒巴洛迪利就拗柴上陣成疑，但好消息係大衞施華已經傷愈重返大軍，今晚極大機會擔正。好多人話曼城人才濟濟，出邊個都無所謂，不過朱楓一直覺得施華仔係冇人可以代替，曼城今晚有番呢位目前英超冧巴溫助攻王壓陣，進攻肯定順暢好多。




韋根近況曳6場不勝




如果用曳嚟形容曼城近況，咁韋根就一定要用超曳嚟形容。繼英超主場1:4慘敗畀新特蘭後，上周喺足總盃竟然作客不敵英乙球隊史雲頓，錄得6場不勝。雖然韋根今場有翼鋒古沙特傷愈復出，但中場迪亞美就要代表塞內加爾備戰非國盃唔响度，一來一回根本冇乜分別。最慘領隊馬天尼斯賽前仲長他人志氣，居然大讚曼城嚟緊可以統治歐洲，勁過皇馬同巴塞，試問班細嘅聽到點會唔氣餒？今晚破到蛋已經還得神咯！

好波有得睇

英超‧韋根 Vs 曼城周二凌晨4:00‧有線200、300、GT

直播以電視台公布為準

賽果熱線：2707 9900　　周二清晨5時20分起至晚6時止