拿玻里叉足電博儲分

猪拉多纳

16/01/2012
文： 巨高

意甲周二凌晨上演獨腳戲，拿玻里主場對博洛尼亞。意甲大約打咗一半賽程，拿玻里教練馬沙利及會長迪羅倫迪斯，已將目標鎖定為積分榜頭五位。考慮到未來日子仍要應付歐聯，目標可算係恰如其分，趁歐洲賽未開前，拿玻里喺聯賽肯定場場搏儲積分，以製造出近期當地媒體經常強調嘅「積分緩衝區」。對手博洛尼亞作客例腳軟，今晚去到聖保羅球場可謂等劏，「讓球主勝」可放心捧場。（周二凌晨3時45分開賽）




拿玻里喺歇冬前曾失分畀羅馬及路華拿，全因球員喺歐聯搏得太盡，球員身心俱疲梗係影響表現，但經過假期之後，拿玻里又再回復生氣，先係作客贏巴勒莫，再喺意大利盃淘汰切塞納。




拿玻里班波識放唔識收，一落到球場就冇保留，故此充足休息對拿玻里極為重要，短暫假期令到拿玻里體力回復正常，失準可能性自然減到最低。縱然好波之人拿維斯有傷難上陣，但代替者彭迪夫一樣咁出色。呢件「馬其頓之寶」轉投拿玻里後尋回第二春，況且左腳球員可令中前場陣式更見對稱，效果未必差得過拿維斯。


博洛尼亞作客死火


博洛尼亞表現的確有改善，但所謂改善只限於主場，今場要作客就唔多睇好。至於喺對賽往績方面，博洛尼亞近五次到訪聖保羅球場錄得一和四負劣績，數據欠支持一於捧主隊。