AC強鋒摧毀國米

猪拉多纳

15/01/2012
文： 走肖

今晚意甲「米蘭打吡戰」好睇過戲，AC米蘭喺聖西路對國際米蘭，讓平半個1.8倍上盤抵撐，紅黑兵團前線有伊巴謙莫域當弗，中場又有施多夫傷愈，而且近年意甲半程冠軍封王機會勁高，試問AC點捨得失分？梗係開行火力砌低國米再講啦！（now633及660台周一凌晨3:45直播）




目前榜首嘅AC領先國米8分，表面睇和波都有着數，但實情係AC同祖雲達斯同分，假如呢場有咩差池，下周對路華拿好可能上唔番半程冠軍位置，要知道意甲進入3分制時代後，半程冠軍有12次帶到尾，當中得5次失落錦標，換句話有70%機會封王，所以無論對於信心定士氣，紅黑兵都有需要踩行油搶3分。


AC阿比迪 施多夫傷愈


陣容方面，AC傷兵問題已大為好轉，雖然賽前傳出阿古蘭尼又整親要抖多兩星期，但施多夫同阿比迪好番踢得，最重要係伊巴謙莫域連續6場聯賽入波，帶挈AC近8戰每場至少入2球，就算國米有科蘭、史奈達同馬爾干擺脫傷患，迪亞高米列圖翻生連續2場有進帳，都唔似阻到死對頭開W，聯賽5連勝走勢係時候斷纜。


藍黑軍33歲中堅組合牙煙


仲有呀，AC剛啱宣布同教練阿里基續約，咁嘅情況，佢自然要落柯打嗌球員搏命，唔係點對得住保佢嘅老闆貝魯斯干尼先？




相反，對家國米和波都幾乎要投降放棄爭冠軍，今鋪焗住喪攻搶分，好容易出事，咪忘記藍黑兵團一對中堅組合盧斯奧同森美爾，都已經年屆33歲，近年明顯走下坡，靠佢哋頂住倒戈嘅伊巴謙莫域，難啲喎！


橫數千軍


AC火力冠意甲

‧近3次對賽全勝，入6球、失1球。

‧17戰入37球，係意甲火力最強嘅球隊。

國米旺開入球單

‧近11場未試過半場落後，3次領先、8次打和。

‧對上8場有7次開入球單。