亨利難越自由球場

猪拉多纳

15/01/2012
文： 樂比堅尼

今晚英超壓軸戰，「兵工廠」阿仙奴作客史雲斯。威爾斯球隊史雲斯今季聯賽喺主場自由球場表現相當醒神，踢咗半季僅輸過一場，阿仙奴陣容嚴重不整，作客成績亦唔多可靠，亨利效應作客唔一定掂。阿仙奴今場讓波信唔過，樂比仔捧史雲斯「讓球主勝」！（有線200及300台周一凌晨零時直播）




樂比仔早在季前已預期史雲斯今季會取得美滿成績，領隊羅渣士果然冇令球迷失望，史雲斯踢出悅目風格之餘，唔係一味靠守，好似史葛冼佳亞、丹尼格拉咸、里安比頓及尼敦戴亞等人都發揮得相當出色，今季主場僅輸過畀曼聯，可見要作客贏佢哋相當困難。




雖然阿仙奴近期勢頭唔錯，上仗足總盃更憑亨利後備上陣一箭定江山，以一比○擊敗列斯聯，不過睇番阿仙奴喺成個聖誕新年快車檔期其實表現麻麻，近四仗都係入一粒，攻力嚴重不足，加上後防一向唔穩健，今仗作客史雲斯有暗湧！


防線多名主力倦勤


事實上，阿仙奴今仗有多名球員缺陣，除謝雲奴、查馬克要踢非洲國家盃外，傷兵包括華美倫、基蘭基比斯、戴亞比、沙格拿、韋舒亞、安德里山度士等人，另外路斯基、梅迪薩卡亦有傷在身，今仗上陣成疑，由於多名缺陣球員都來自防線，一向不穩嘅阿仙奴後防實在令人擔心，今仗作客史雲斯失分一啲都唔奇！


阿仙奴新箭 亨利想當年


「想當年我攞過兩屆英超冠軍、四次英超神射手，今次返嚟仲勁到即刻入波！我喺英超發威時，史雲斯仲踢緊英冠英甲，就等我今晚落場射死呢隻『天鵝』！」


昆士柏流浪新帥 曉士想當年


「亨利，我就冇你撈得咁掂，舊年六月畀富咸炒魷後，都失業咗半年喇！難得昆士柏流浪今次請我，今晚第一擊梗係要好好睇睇，鬥紐卡素起碼要頂住唔好輸！」