利物浦強勢再下一「城」

猪拉多纳

14/01/2012
文： 郭球奇

做利物浦球迷近排認真幸福，睇住球隊接連喺兩項盃賽贏波後，啱啱又收到隊長謝拉特續約踢至收山嘅喜訊，今晚返到英超主場對住「私房菜」史篤城，球奇睇好紅軍可再下一城，繼續向前四進發，2.05倍「讓主」值得一試！（有線201及301周六晚11:00直播）


退休後改任「紅軍」大使


利物浦近排一洗海鮮波污名，繼足總盃大勝奧咸晉級後，喺英聯盃4強首回合作客再贏不可一世嘅曼城，晉級決賽形勢大好。嗰場波射入奠勝12碼嘅謝拉特，喺贏波後不足24小時，更宣布續約多1年踢至收山，退休後擔任球會大使。雖然「謝老四」今年已31歲，但自從佢對紐卡素復出後，上陣4場入咗3球，證明佢對紅軍仍然好有影響力。




紅軍中場史比寧日前對曼城傷出，今晚極大機會缺陣，不過球奇覺得呢名後生仔踢法一向唔太硬淨，對住史篤城呢啲粗枝大葉球隊，冇佢出番查理阿當鎮守中路仲好，再搵謝拉特後上支援安祖卡路爾，絕對係填補蘇亞雷斯繼續停賽嘅最佳陣式。


史篤城錯配搵雙中堅踢閘


史篤城近況同樣唔差，上場足總盃贏基寧咸後，已累積4場不敗，不過領隊佩尼斯近排唔知諗乜，竟然搵活基治同賀夫呢對中堅改打雙閘，今晚對住行軍迅速嘅紅軍，假如再咁做肯定有麻煩。何況史篤城作客晏菲路一向冇運行，近10次只得2和8負，對上一次作客贏紅軍要數到1959年，今鋪想靠怪陣破宿命？窄啲喎！


史篤城訪晏菲路冇運行


日期 戰果




11/02/03 利物浦 2:0 史篤城

09/08/19 利物浦 4:0 史篤城

08/09/20 利物浦 0:0 史篤城

94/10/25 利物浦 2:1 史篤城

91/09/25 利物浦 2:2 史篤城

日期 戰果

88/01/12 利物浦 1:0 史篤城

85/02/23 利物浦 2:0 史篤城

83/11/19 利物浦 1:0 史篤城

83/03/05 利物浦 5:1 史篤城

83/01/29 利物浦 2:0 史篤城