朗尼爆「髮」曼聯打殘保頓

猪拉多纳

14/01/2012
文： 力奇

及時喺足總盃反彈嘅曼聯，今晚喺英超回師主場迎戰保頓，梗會乘勝追擊務求洗脫聯賽2連敗陰影啦！紅魔近排傷兵問題得到紓緩，加上朗尼又重拾射門鞋，啱啱仲轉埋新形象做「鬈毛仔」添，今晚睇怕又係佢Show Time喇，讓2球都好，照捧2.1倍「讓球主勝」啦！（有線200及300周六晚11:00直播）




早排「紅魔鬼」喺聯賽先後不敵布力般流浪同紐卡素，同時仲傳出朗尼同費Sir不和隨時走人，嗰陣確係幾濕滯嘅，不過事實話畀大家聽，一切都已成過去，事關曼聯喺上星期足總盃對曼城，就係靠朗尼梅開二度險勝3:2。


保頓卡希爾掛住轉會


查實「魔童」有冇貨交，對紅魔嚟講真係好緊要！日前佢出席國際足協頒獎禮，竟然「儲夠」頭髮轉新Look，整咗個「鬈毛頭」，須知道呢位射手植髮後信心返晒嚟，頭髮愈多士哥愈多，佢家陣已有13球進帳，上仗又整2粒，狀態靠得住架！仲有，曼聯嘅十字軍已進一步減少，之前因傷斷斷續續休戰嘅基斯史摩寧、菲爾鍾斯同里奧費迪南上周對曼城已經復出，防線更加穩陣，咪忘記紅魔對上8季主場對保頓例攞3分，當正保頓係私房菜，今鋪點會甩拖先？




保頓家陣排喺聯賽榜尾3，實力有幾弱毋須多講，雖則話佢哋今仗會有門將積亞基連倫傷愈，但久休復出狀態未得，隨時係計時炸彈嚟架！最弊係後防重心加利卡希爾同一眾豪門扯上關係，據報佢仲好可能踢埋今仗，之後就過檔車路士，掛住轉會跳船，又點踢好波呀？今鋪保頓作客，真係輸3、4球都唔出奇o架！


橫數千軍


 曼聯地頭場均入3粒




‧近8季聯賽主場均贏保頓。

‧今季主場聯賽平均每仗入3球，為英超第2多。

 保頓防線英超最弱

‧開季20戰僅和1場。

‧開季20戰失43球，平均每仗失2.15球，為英超最多。