車仔難破黑貓魔法

猪拉多纳

14/01/2012
文： 樂比堅尼

今晚英超車路士喺主場史丹福橋球場對新特蘭，樂比仔冷敲「黑貓」！新特蘭自奧尼爾上任後脫胎換骨，七場波有六場贏盤，堪稱英超新盤王，反觀車路士持續低迷，前線多人缺陣今仗熱W有暗湧，捧新特蘭「讓球客勝」。




（有線204及304台周六晚11時直播）




車路士踢咗二十場聯賽後僅得十一勝四和五負排第四，除係阿布拉莫域入主以來最差聯賽成績，仲落後榜首曼城多達十一分，基本上爭標唔使預佢。車仔半季以來，表現依然冇乜改善，最慘係以往主場霸氣全部冇晒，近兩場聯賽主場對維拉、富咸等中游球隊都贏唔到，今仗對復甦嘅新特蘭難言穩勝！


靠費托信唔過


事實上，車路士目前最大問題係攻力不足，隨着安歷卡轉會、杜奧巴同沙洛文卡勞離隊踢非洲國家盃，車仔進攻選擇更加少，雖然車仔最近同多位球員扯上關係，但遲遲未作出正式收購，最令人擔心係首席射手史杜列治養傷，車仔得番「廢托」費蘭度托利斯喺前線搵食，要攻破「黑貓」防線真係唔容易。




新特蘭自奧尼爾領軍後踢咗七場波，成績為五勝一和一負，計盤路贏六場，僅得一場輸半格，其實奧尼爾接手後都係用同一班人，不過佢嘅領軍級數遠勝前任布魯士，依家新特蘭喺佢麾下士氣相當好，對住冇牙老虎車路士真係一啲都唔驚，上季新特蘭作客史丹福橋都試過爆大冷贏三比○，所以大家千祈唔好畀車仔名氣嚇親，一於支持黑貓！