馬里迪莫上下一心趁熱食

猪拉多纳

08/01/2012
文： 九叔



馬里迪莫Vs奧漢倫斯


一隊波有幾件主將畀人撬緊，究竟係好事定壞事呢？積極方面睇就梗係好事，班人唔掂搵鬼要咩！葡超隊馬里迪莫就面對緊呢個問題嘞，不過佢哋嘅士氣仲Keep得好好，今日主場對換咗主帥嘅奧漢倫斯，1.5倍主W趁熱食。（開賽時間：周一凌晨0:00）




由歇冬前開始，馬里迪莫個射手巴巴迪亞華拉、後衞羅比加幾個，都話有球會吼中想挖角，搞到會長彭利拿要走出嚟話會不惜一切留人，尤其嗰件以9球高踞葡超射手榜首位嘅塞爾維亞仔巴巴迪亞華拉。老細出到聲，班人又唔係急住轉飯鑊搵銀，所以大家仲係好融洽，都想同心協力踢出好成績先。


奧漢倫斯6戰不勝


相反奧漢倫斯就唔掂嘞，教練法基亞炒咗，由干斯卡奧揸旗唔在講，至弊係佢哋自舊年11月30日起，至今6戰不勝，作客對上一次贏波更要數到4個幾月前，隊波衰成咁，又點頂得住馬里迪莫吖！更重要係馬里迪莫今季只係輸過畀波圖、士砵亭、賓菲加同布拉加4大勁嘢，要贏奧漢倫斯絕冇難度，唔係足智彩都唔會開得佢哋咁熱啦。