PinkyJoJo決戰高志超

猪拉多纳

08/01/2012


全城期待今晚英格蘭足總盃曼市打吡戰，《太陽波經》賽前專程請嚟兩位now觀星台主播Pinky（羅沛琪）同JoJo（陳瑋儀），聯同前港隊門將高志超，去到阿仙奴足球學校主場嚟番個「前哨戰」。最終代表曼聯嘅Pinky射12碼嗰陣氣走曼城JoJo，唔知紅魔今晚又會唔會咁好彩呢？


羅沛琪Like爆碧咸C朗


Pinky同JoJo今次化身曼聯及曼城嘅小粉絲，但原來Pinky未做主播之前係一名OL，早前參加主播選拔賽脫穎而出踩入主播界，從此擺脫刻板生活，日日搵猛料。Pinky本身主力報道娛樂，但查實佢對體育資訊亦有一定認識，尤其係外國足球球星，好似碧咸同C朗呢啲「萬人迷」，佢更加係瞭如指掌添！


NBA迷JoJo最想訪問智叔


至於喺美國讀書，勁熟NBA嘅JoJo，最鍾意就係勒邦占士同「甜瓜」安東尼，至Like足球球星就係曼城「腦殘」巴洛迪利，唔通JoJo真係專攻「麻煩友」？哈，其實唔係嘅，JoJo自從當上主播後，最想訪問人物竟然係顧家好男人、出名好戲嘅廖啟智，皆因JoJo曾經修讀電影，最欣賞嘅本地演員就係智叔，覺得佢最能夠演活小人物嘅神髓。




講番兩位靚女嘅12碼大戰，雖然JoJo腳頭重過Pinky，但可惜對住前港隊門將高志超，要射穿對手十指關入波又點會咁易？反觀Pinky嘅射門出奇刁鑽，所以最後由代表紅魔鬼嘅Pinky以3:2贏出呢場另類曼市打吡戰，不過結果係點都冇所謂啦，證明兩位主播睇得、Talk得又玩得咪夠囉！