紐卡素防線崩潰

猪拉多纳

04/01/2012
文： Wendy

曼聯呢班後生仔真係激親費Sir，上星期六整場咁嘅生日禮物做禮，明明費Sir開波前聽住生日歌春風滿面，完場後塊面仲黑過包青天，睇嚟成班紅魔鬼都畀費Sir開拖！話晒依家聯賽一分、甚至一個入球也不能少，今晚作客紐卡素一定開出客勝！




成班波最生性都係啱啱續約嘅貝碧托夫，雖然先輸十二碼累球隊輸波，但起碼都交足功課連入兩球，佢簽約後真係特別fit，近三場都有波入，今晚實有正選，搭番復出嘅朗尼數胡！雖然曼聯今季主場被紐卡素逼和，但當日紐卡素門神告魯爾上晒身先能力保一分，要告魯爾今晚再有神奇演出？難矣！早幾晚紐卡素作客利物浦，防線錯漏百出，丹尼森遜患得患失嘅表現更加直接令球隊失分，再加上近期高洛仙尼狀態回落，紐卡素防線比季初已相差甚遠！


紅魔留力足總盃小勝啱數


紐卡素防線差直接影響近期成績，自從被曼城打破聯賽不敗身，近八場賽事只贏過目前包尾嘅保頓，成班波好似食咗瀉藥咁！丹巴巴亞雖然踢得幾好，但最慘後場供應不足，要佢一個獨自搵食又太吃力，陣中最強嘅中場賓艾化，自復出後都未搵番最佳狀態，認真可憐！




同埋唔知點解曼聯每次北上，對住紐卡素都好似格食格咁，近六年作客取得四勝二和，紐卡素每季都好似拎定分出嚟進貢畀曼聯咁！今晚班紅魔鬼應該醒定，唔會再令費Sir新年流流飛多次砵，但各位要博曼聯大勝亦都要諗諗，事關曼聯嚟緊足總盃就要作客大戰曼城，今晚可能見好就收，不求大勝。


Wendy推介：曼聯客勝


熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經。




phone波熱線：1831 678

電郵：soccer64@cabletv.com.hk

「球彩台俱樂部」開放時間：晚上10:30-11:45