小心快車第二站熱門陷阱

猪拉多纳

31/12/2011
文： Wendy

2011年眨吓眼就去到最後一日，呢一年球壇發生嘅大事，我哋前晚球彩台都有做回顧，我自己就揀咗「傑斯偷食」係最轟動。對投X者嚟講，未必對球壇大事回顧有興趣，反而回顧，吓自己個投X戶口，嚟個結算就會！希望你哋跟我買波冇招致損失啦，哈哈哈！




英超快車期嘅波都幾難買，上一輪曼城、利物浦、車路士等大熱倒灶和波，當然唔可以話佢哋蠱惑。賽程咁密集，強隊偶有失拖都好正常，今晚熱刺作客史雲斯，個客勝買落去都有啲唔放心，覺得都會係今輪熱門陷阱，所以對受讓嘅史雲斯「讓球主勝」，反為有興趣。




（有線204及304台周六晚11時直播）


史雲斯主場守到熱刺


熱刺企得喺第三位，實力當然有番咁上下，上場作客另一隊升班馬諾域治完全掌握主導權，五位中場表現好出色，加里夫巴利梅開二度，另外要留意巴西防中辛度雲尼亞里嘅路數愈嚟愈好，乜波都畀佢掃晒。不過上場踢得點好都冇用，熱刺最乞人憎嘅就係表現不穩，時好時壞。




雲達華治其實有傷頂硬上，加里夫巴利上場咁搏，今場返老家係咪仲有氣？佢哋作客成績雖然暫排第二，但贏過嘅對手全部都係「屎波一族」，賽績信唔過，呢個客勝有妖味。




威爾斯球隊史雲斯以升班馬嚟講暫時排第十四位算唔錯，佢哋防守能力比諾域治更好，呢樣亦係佢哋最煞食嗰瓣。今季九場聯賽主場只失三球，有六場都可以保持零失球，係主場最佳防守力球隊，所以分分鐘可以守和熱刺。加上佢哋連續兩場都係主場出擊，反而熱刺就喺周中同今晚連續作客，咁你話邊隊着數啲？

Wendy推介：史雲斯 Vs 熱刺 讓球主勝

熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經。

phone波熱線：1831 678

電郵：soccer64@cabletv.com.hk

「球彩俱樂部」開放時間：晚上10:30至晚上11:45