紅魔除夕賀大壽

猪拉多纳

31/12/2011
文： 麥馬拿仁

曼聯誓大炒布力般升英超榜首，為領隊費格遜送上最佳生日禮物！今晚大除夕係老費七十大壽正日，一班紅魔鬼梗係要識做，大勝一場壓過曼城，以「一哥」身份迎接2012年。曼聯近兩戰都大炒對手五球，主場會當布力般靶咁射，大細中位數調至3.5球照捧大！（有線200及300台周六晚8時45分直播）




費格遜帶領曼聯廿五年，係球會史上最受尊崇人物，今日係佢七十歲正日生日，老費早前講過，好希望生日時球隊能升上英超榜首。目前曼聯追到與曼城同分，由於曼城聽晚先有比賽，換句話說曼聯今場唔輸就「達標」，但爵爺出名惡死，一班球星都買佢怕，今仗真係贏少球都唔高興。


奧脫福謝幕旺入球騷


曼聯於歐聯出局後專注爭聯賽冠軍，表現可圈可點，近四仗全勝當中包括大炒狼隊、富咸同韋根，入球總數都達五球。紅魔鬼陣營有唔少傷兵，雖然菲爾鍾斯能夠復出，但里奧費迪南上陣成疑，莊尼伊雲斯、尼曼查維迪、基斯史摩寧又缺陣，分分鐘又要搵卡域克打中堅，後防唔係冇隱憂，咁前面就要入多幾粒啦！另外畀多個數據大家，曼聯近六季於年尾最後一個英超賽日，五次主場出戰全勝，有四場總入球都去到五球！




布力般上仗雖逼和利物浦一比一，但只係紅軍把握力曳，今次唔會再咁好彩。布力般後防傷兵名單得人驚，基維、賴恩尼爾遜、史葛丹恩全部缺陣，馬田奧臣亦大有機會唔出得，中場大將鄧尼又上陣成疑。佢哋本季十場作客僅有一場冇波入，絕少掛零，所以今戰捧大真係好啱數。


有績可尋：上季 7:1 貝碧翻尋味


曼聯近六次主場鬥布力般全勝，當中五次淨勝兩球或以上，上季主場大炒七比一，貝碧托夫個人獨取五球，成為英超史上首位單場入五球嘅非本土球員，呢名保加利亞射手近況回勇，連續兩場有士哥，上場對韋根更大演帽子戲法，睇嚟今場又係佢數胡時候。


曼布近10次交手成績


球季 賽事 戰果

10/11 英超 布和1:1

英超 曼勝7:1

09/10 英超 布和0:0

英超 曼勝2:0

08/09 英超 曼勝2:1

英聯盃 曼勝5:3

英超 布負0:2

07/08 英超 布和1:1

英超 曼勝2:0

06/07 英超 曼勝4:1