紅軍碌唔起卡

猪拉多纳

30/12/2011
文： 麥馬拿仁

周六凌晨英超上演2011年最後一輪賽事，獨腳戲利物浦主場撼紐卡素。紅軍本季主場毫無霸氣、勝率極低，今戰仲有攻擊靈魂蘇亞雷斯停賽，安祖卡路爾、謝拉特又未有狀態，更冇入波板斧。「喜鵲」有鬥心有隊形，本季客敗率唔夠兩成，捧「讓球客勝」！（有線200及300台周六凌晨3時45分直播）




如果係利物浦粉絲，本季真係睇作客好過主場，因為大部分晏菲路上演賽事都令球迷大失所望。球隊主場雖仍保不敗，但只得三勝六和戰績，得三成三勝率，當中和過新特蘭、諾域治、史雲斯同布力般流浪等弱旅。睇番戰情，紅軍大多數賽事表面上撳住揪，但開局時真正入肉埋門唔算多，係到完場前先谷埋啖氣狂抽猛射，對手門將熱夠身每每作出神勇撲救，故近六主場贏得一場，贏都係贏昆士柏流浪一粒。紅軍中場欠創造力，周時老鼠拉龜，今仗仲要有「哨牙蘇」因向富咸球迷豎中指而被罰停賽，鋒力弱上加弱。




環顧紅軍中前場攻擊手，現只有比拿美同麥斯洛迪古斯最弗，卡路爾打極唔起，倒戈易被嘜死，古積特雪到硬晒，謝拉特剛傷愈多數只任後備，都唔知搵邊個入波。預計今戰利物浦依然能控制戰局，但就難以撕破對手防線。


紐卡素及時反彈


紐卡素季初曾十四戰不敗，最近成績回落，但整體演出冇走樣，上仗作客擊敗保頓令士氣回升，有力保不敗。