廠仔屠狼開殺戒

猪拉多纳

27/12/2011
文： 朱楓

每個人喺聖誕同新年都有願望，阿仙奴領隊雲格亦唔例外，近日表示希望喺呢段快車檔期狂搶分入番前四重燃爭標機會，今晚主場對狼隊當然唔會留手，適逢尹佩斯仲差兩球就平舒利亞入波紀錄，今晚入到狼群隨時大開殺戒，1.58倍「讓球主勝」值得熱捧！（有線200及300、廣東體育周二晚11:00直播）




阿仙奴今季認真神奇，由季初一度沉淪降班位置，依家竟然殺入「Big6」，領隊雲格當然居功至偉。近日「教授」就公開叫班球員一鼓作氣，藉聖誕及新年檔期打入前4，重燃爭標希望。其實又難怪雲格咁心雄，事關兵工廠喺今年快車檔期抽到條靚籤，今晚對完狼隊後，跟手只係對昆士柏流浪同富咸，只要班細嘅畀足心機，全取9分唔難。


阿仙奴桑治刑滿復出


更何況阿仙奴呢場繼續有近況弗到着晒火嘅尹佩斯壓陣，呢位荷蘭射手上場對維拉入波後，經已追平亨利一年入34球紀錄，今晚只要入多兩粒，就可平埋紐卡素名將舒利亞一年入36球嘅英超紀錄，話唔埋省多件，仲會破紀錄添，再加上今季頻頻交靚波嘅中場桑治今晚又刑滿復出，守將佐羅又趕及傷愈，強陣出戰試問點會甩拖？


狼隊連續13場失波


上季僥倖成功護級嘅狼隊，今季繼續主強客弱作風，難怪依家繼續喺下游掙扎。賽前領隊麥卡菲強調球隊想護級成功，最重要就係團結，但老實講，睇見狼隊近6場英超全敗戰績，就知佢哋一作客根本係成盤散沙。最恐怖係狼隊對上一次作客入阿仙奴波已經係1984年，對上一次作客贏阿仙奴更加要數到1979年，睇埋佢哋已連續13場有失波，對上3場每場至少失2球，今晚又好大機會續有中場奧哈拉缺陣，輸兩粒睇怕都係最低消費！