富咸星散車仔發難

猪拉多纳

26/12/2011
文： 走肖

西倫敦打吡「拆禮物日」預埋你，車路士今晚早場主場迎戰富咸，睇怕要開番場「讓球主勝」氹球迷，因為車路士領隊保亞斯上任以來，從未試過喺倫敦打吡威過，撞啱富咸喺歐霸盃出局之後，準備進行新年大清貨，出售多名主將，士氣瀕臨崩潰要避開。（有線200、300及廣東體育周一晚9:00直播）




保亞斯上季帶領葡超冠軍波圖成為4冠王，但上車後表現令人失望，現時車仔距離榜首嘅曼城11分，爭標基本上唔使諗，而且中場約翰米基爾同後衞伊雲洛域上場對熱刺連環受傷，巴西國腳拉美利斯又要停賽，加上前鋒安歷卡同中堅阿歷士洛里高等轉會入雪櫃，咁嘅情況面對聖誕新年快車賽程，一唔小心就跣胎甩轆。




正因為咁，假如車仔連呢場都贏唔到的話，相信保亞斯又會聞到魷魚味，特別係車仔今季喺英格蘭聯賽盃對富咸，只係靠互射12碼淘汰對方，聯賽對同市嘅昆士柏流浪、阿仙奴同熱刺又只得1和2負，即係話90分鐘計數保亞斯喺倫敦打吡未贏過，除非保亞斯博炒拎違約金放大假，否則今場真係唔衰得。


富咸鋼門舒華沙有排抖


睇低富咸原因好簡單，首先鋼門舒華沙仲養緊傷，射手森莫亞又同領隊祖爾擘面走硬，最慘係歐霸盃臨天光失波悲情出局後，據聞高層決定平價清貨減磅，前鋒安祖莊臣、翼鋒杜夫分別被布力般流浪同格拉斯哥流浪睇中，價錢只係200萬鎊同150萬鎊，散班咁嘅款，點捧得落呀？