省港盃睇波團惠州走難

猪拉多纳

24/12/2011
文： 波男

一年一度嘅省港盃就快到，去年雙方提出今屆各出廿五萬元，勝方獨得五十萬獎金嘅協議唔知仲算唔算，不過省隊就非常認真，將以強陣出擊準備贏波贏牙骹，港隊方面亦操咗三課，召入高梵、麥基同積施利等入籍洋將，仲搞埋拜神切燒豬，做足準備同省隊鍊過。


「早去晚返」攞苦嚟辛


波總喺今屆賽事安排有些少阻滯，原本希望十二月廿八日舉行嘅首回合賽事按排喺旺角場舉行，點知封場養草唔用得，要改去香港大球場開波，至於元旦舉行嘅次回合作客，省足協將賽事搬去惠州上演，港隊賽前一日出發，元旦比賽，至於波總招待各屬會人士嘅睇波團，卻係即日來回，早車去，晚車返！




如此安排，有屬會人士搖頭苦笑咁話，唔跟大隊自己搭車上去可能仲好，因為元旦假期過關實多人，去程同回程亦好大機會塞車，睇波團隨時變走難團，盞攞苦嚟辛。




辛苦只係其次，即日來回亦令省港盃傳統蕩然無存，因為早年嘅睇波團係三日兩夜，屬會人士比賽前夕到埗，正日入場睇波，賽後再過一晚先至返香港，呢段時間亦係各屬會聯誼溝通嘅好機會。




「鳳凰計劃」出台後，本地波好多嘢等緊改革，估唔到省港盃睇波團亦被精簡化。查實惠州啲酒店唔係貴，有心支持港隊嘅屬會人士，不如自掏腰包上去住一晚，舒舒服服捧港隊場好過啦。