倒戈柏比上位不忘舊東家

猪拉多纳

21/12/2011


今晚意甲榜首祖雲達斯將造訪烏甸尼斯，兩強相遇，賽前氣氛自然緊張，不過今仗倒戈嘅「斑馬軍團」射手柏比就向對手烏甸尼斯大笠高帽，話自己全靠呢隊舊東家先成功上位。




柏比喺上季以借將身份加盟祖雲達斯之前，曾為烏甸尼斯効力3個球季。柏比接受當地傳媒訪問時，亦流露出對舊東家嘅思念，更自覺欠咗烏甸：「烏甸尼斯係個強勁對手。呢間球會畀咗好多嘢我，係佢哋令我成功榮升大國腳。」


季初幾乎被放逐俄羅斯


呢位翼鋒今季季初差啲被賣去俄羅斯，幸好干地接掌「老婦人」帥印後，決定留住柏比，佢除咗成功搶贏塞爾維亞翼鋒卡錫個正選位外，更獲意大利國家隊重召，令佢登上職業生涯高峰。雖然佢三番四次幫舊東家講好說話，但佢並冇長他人志氣，滅自己威風，賽前亦不忘為「斑馬兵」振聲威：「我可以為祖雲達斯上陣，都係全靠烏甸……不過我哋仍然會盡力爭取好成績！」