阿古路計劃29歲返獨立隊

猪拉多纳

21/12/2011


阿古路心繫母會獨立隊！97年加入獨立隊青年軍嘅阿古路，06年轉會馬體會，到今季加盟曼城，唔經唔覺喺歐洲已踢咗接近6年。雖然依家事業如日中天，不過現年23歲嘅佢，近日就向阿根廷電台《Ecos del Rojo》表示，希望喺2017年重返獨立隊：「我喺歐洲踢波，但我時時刻刻都同自己講要喺29歲重返獨立隊。雖然喺英國好難睇佢哋嘅直播，但我每個禮拜都嘗試搵link睇番佢哋啲波，因為我真係好鍾意獨立隊。」


足總盃打吡分波飛惹紛爭


另方面，下月8號曼城會喺足總盃第3圈主場對曼聯，根據賽例，曼城要分15%門票畀客隊球迷，但曼城近日以保安為由，只肯畀5,400至5,800張波飛，結果令曼聯非常不滿，向足總投訴曼城玩針對，希望對方介入事件，仲恐嚇假如重賽，一定會向曼城報復，未埋牙已充滿火藥味！