拜仁誓斬波琴

猪拉多纳

20/12/2011
文： 蘇斯黑柴

德甲首循環冠軍拜仁慕尼黑今晚再度出師，於德國盃16強作客對德乙波琴，為球隊2011年謝幕，拜仁今仗將會派出唔少副選助陣，但計質素仍遠勝乙組仔，球隊近期狀態同士氣都處於高峰，全隊上下對今仗亦相當重視，預期可以輕鬆取勝，1.45倍「讓球客勝」可作過關重心。（無綫翡翠台周三凌晨2時直播）


副選爭上位必搏


拜仁上周末德國於大部分時間以寡敵眾下以3球輕取科隆，全場更佔壓倒性優勢，今仗賽前未有因為對乙組仔而輕視對手，執行主席路明尼加同隊長拿姆已下必殺令，誓以一場痛快勝仗為2011年畫上完美句號。事實上拜仁近兩季於年終最後一戰都有卓越表現，前季德甲主場大炒哈化柏林5:2，上季德國盃亦贏史特加6:3，證明唔會因為放假在即而有所鬆懈。拜仁今仗會畀機會一批副選上陣，球隊已講明歇冬期將冇出冇入，一班副選必須趁機會給予主帥軒歷基斯良好印象，有機會落場必然盡搏，求未來有更多出場機會。


實力懸殊難偷雞


波琴今季於德乙起步脫腳，一度跌落倒數第2，好在9月中換帥成功，新帥碧治文上任後，球隊12戰共取得20分，由尾二升上目前的第9位，該隊近期狀態正佳，上周末作客2:0擊敗FSV法蘭克福，於慕尼黑出生嘅守將高碧連同北韓射手鄭大世於上半場分別建功，若非下半場日援乾貴士、隊長達保斯基同進攻中場費達歷高先後失機，理應贏得更多，把守最後一關嘅盧菲亦被踢球者雜誌選為德乙首循環最佳門將，今仗有良好狀態挑戰拜仁。




不過，黑柴認為兩軍級數始終相差太遠，何況拜仁助教謝蘭特過去於波琴執教多年，對主隊瞭如指掌，拜仁近5次作客波琴取得全勝，近兩次更先後以3:0及5:1大勝而回，今仗主隊好難有機會偷雞。