華倫西亞開上盤過冬

猪拉多纳

18/12/2011
文： 鄭少偉

西甲踢埋今晚就會收爐，過埋年先重燃戰火，今晚壓軸大戰戲碼勁有睇頭，「三哥」華倫西亞主場迎戰第6位嘅「西甲曼城」馬拉加，華倫要保持挑戰聯賽錦標一線希望嘅話，絕對唔容許失分畀「同級」對手，信多華倫嘅超級鋒力一次，讓半一唔嫌多，撐好分過W嘅上盤！（now632台周一凌晨4:30直播）


蝙蝠軍團歐聯出局專注聯賽


依家積分榜排第3嘅華倫，賽前同踢多一場嘅巴塞有7分差距，「亨利」認為佢哋應該仲有得搏吓嘅。華倫本身實力唔差，可惜衰黑仔，就好似之前作客馬略卡同上場對貝迪斯咁，都係臨天光瀨尿，搞到贏變和、和變輸，認真陰功。




不過，「蝙蝠軍團」始終係西甲奇兵，無論近幾季點樣將啲主力賣走，佢哋都可以Keep到，「亨利」真係好佩服佢哋。之前要分心征戰歐聯分組賽冇得講，如今歐聯夢告一段落，仲要放假在即，相信可以放心去盡，憑由蘇爾達杜領軍嘅超強鋒線，要搞掂客軍馬拉加，應該唔會有太大難度。




季前殺聲震天嘅馬拉加演出十分飄忽，上個月聯賽有2勝1和咩？到呢個月踢咗兩場就只得1和1負，水準咁唔穩定，作客華倫就算受讓半一都撐唔過！