祖記保榜首狂數路華拿

猪拉多纳

18/12/2011
文： Katie

Katie鋪波癮真係好大，早幾日有場漢堡明星隊對「施+朗朋友隊」嘅反貧窮籌款賽，小妹特登上網搵Link睇，究竟係乜嘢驅使我天寒地凍都捱眼瞓睇波呢？之唔係因為施丹囉！呢位法國「球王」果然冇令我失望，家陣都一樣係咁好波兼星味十足，我夠膽講施丹依家復出都一樣有貨交。




講番場波，有兩個人令我印象好深刻，第一個係麥馬拿文。呢位靚仔係就係好波，不過退役多年都搣唔甩鋪「交通督導員」惡習，以前喺皇馬成日手指指，點老大哥列當度交波已經激死Katie，估唔到今時今日佢都仲係咁，大膽到指揮赫傑喎，你話笑唔笑死人？




另一位要提嘅就係朗拿度，我仲記得媽咪佗住細佬嗰陣，真係肥到成個小露寶咁，「大哨」話晒都係前世界足球先生，退咗役都唔係好耐啫，但佢仲肥過當時大緊肚嘅媽咪，不過腳下功夫依然咁好，呢吓抵讚！


路華拿場均失2粒


讚還讚，Katie睇見朗拿度個大肚腩真係唔多開胃，你話如果好波又大隻嘅話，小妹就最嗒糖嘞！好似祖雲達斯個馬治斯奧（下圖）咁吖，靚仔、大隻兼好波唔在講，司職中場嘅佢今季喺意甲已經攞到6個「士哥」，當中主場就佔咗5球，今晚對住路華拿隨時又數胡。




何況祖雲達斯已經畀烏甸尼斯追到同分，「一哥」位置根本唔穩陣，今晚仲唔趁機搶分咩，戰意唔需要懷疑，況且對手路華拿係目前意甲失波第2多嗰隊，今季聯賽作客未開齋不特止，場均仲失成兩球，祖雲達斯當然有望大勝啦，Katie要1.64倍「讓主」。（中央5台周日晚10:00直播）


Katie推介：祖雲達斯（讓球主勝）


外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。

微博傳情 \(^O^)/

下個禮拜五就係本小姐牛一，Katie已經搵好晒場地準備玩餐飽，實行將聖誕同生日Party撈埋一齊嚟搞，到時肯定好Happy啫！當日小妹係全場焦點，所以最近就密密跳舞做Gym，務求以最佳狀態見人，早兩日我就去咗試衫，唔知大家覺得呢件點呢？唔使(目及)嘞，Katie好保守嘅，呵呵！