熱刺冇包袱入球騷娛賓

猪拉多纳

15/12/2011
文： 樂比堅尼

人嘅欲望係無止境嘅，當你開始成功，就唔會走回頭路，熱刺前幾季踢歐霸一直幾認真，但今季改變策略，重點攻聯賽，以大量新人應付歐霸，成績差亦係意料中事。不過，領隊夏利列納對出局一啲都唔志在，早前更炮轟歐霸制度無聊，預計今仗作客沙姆洛克流浪會繼續派後生仔落場，呢班新人勝在夠落力唔會hea，為博上位相信會努力爭取入球，樂比仔建議捧大盤。（有線61及201台周五凌晨２時直播）


沙姆洛克流浪收咧心散


目前熱刺喺Ａ組排第三，落後第二嘅魯賓卡山三分兼五個得失球，由於對賽成績一樣，同分就要計得失球，即係話熱刺除咗要贏波，仲要望對手輸波，兼且追番五個得失球差，大家都知道機會相當渺茫。




沙姆洛克流浪自知實力低幾班，所以連防守都慳番，索性同對手鬥攻，分組賽五連敗兼每場平均失三球，不過都有四場入到波，由於愛爾蘭聯賽已收咧，球員有holiday mood好正常，如果樂比仔係領隊，就會叫班球員放開懷抱好好享受球賽，而我本人就會買定個大盤，早啲瞓覺等收錢！