熱刺伯明翰 歐霸大作戰

猪拉多纳

15/12/2011


玩歐霸盃最緊要睇球隊心態，事關呢項賽事吸金能力一般，對大球會嚟講只屬「雞肋」，但二、三線球隊反而舔晒脷，好似兩支來自英格蘭球隊熱刺同伯明翰，熱刺去年佢哋嘗過歐聯滋味後，就唔想再返番轉頭，即使依家處於出局邊緣，今晚喺A組作客對愛爾蘭魚腩沙姆洛克流浪，照樣當踢表演賽，冇晒心理包袱下入球唔會少。相反，英冠伯明翰喺H組鬥馬里博爾，就會瞓身喪攻，希望「大」勝以博出線。




歐霸盃H組最後一輪決出最後一個出線席位，英冠球隊伯明翰主場對斯洛文尼亞嘅馬里博爾，伯明翰仲要爭出線，球隊今季主場戰績對辦，今次面對風流球隊馬里博爾實會搏盡，投X首選大盤！




（有線64及204台周五凌晨4時05分直播）


馬里博爾踢風流波


「阿伯」以英冠球隊參戰歐霸盃，今屆表現唔算失禮，目前五戰七分，落後頭兩位布魯日及布拉加三分，不過，由於球隊兩戰布拉加輸晒，肯定無法超越對手，換句話說布拉加已肯定出線，伯明翰唯一晉級希望係今場搞掂馬里博爾，再望布魯日輸波，雖然機會唔大，但相信班波唔會輕易放棄。




伯明翰今季主場表現平穩，聯賽主場保持不敗，全季只輸過畀布拉加，威力甚強，今次全力搏殺，贏面甚高。馬里博爾近兩場對布魯日及布拉加輸波，加埋失咗九球，後防甩漏多，難頂對手強攻，捧大。