馬治斯奧防中變射手

猪拉多纳

12/12/2011


祖雲達斯今季起飛，要多得中場馬治斯奧，此子大熟大勇、瞻前顧後，目前意外地以六球成球隊首席射手，祖記前鋒馬特尼就叫佢唔好再入波，唔係成班前鋒都會失業喎！


兒時偶像係迪比亞路


馬治斯奧雖係防守中場，其實喺祖雲達斯青年軍期間，一直踢開前鋒，而兒時偶像，就係依家嘅隊友迪比亞路，所以成日扮偶像喺前場連扭兩個後衞起腳射門，點知十六歲時畀導師安排打中場，一踢就到廿五歲。不過，佢冇埋沒進攻天分，經常殺上前場助攻，今季終於完全釋放無窮潛能。意國殿堂名帥沙基同維比都捧到佢上天，納比更大讚佢係「意大利謝拉特」：「佢早已係世界級球員，佢就好似謝拉特一樣，全能而富有激情。」




馬治斯奧更可謂「關鍵先生」，今季贏AC包辦兩個入球，贏國米亦入一球，早前意大利盃氣走博洛尼亞，亦由佢奠勝，今場作客羅馬，又係馬治斯奧表演時候。