馬里奧葛斯為德甲爭口氣

猪拉多纳

11/12/2011


多蒙特收到喜訊，陣中十九歲新星馬里奧葛斯榮獲今年歐洲金童獎，成為德甲史上首位獲此殊榮嘅球星，吸引愈來愈多豪門垂青，除咗阿仙奴之外，曼聯亦加入爭奪呢位德國國腳，令佢身價進一步上升，估計達到3500萬鎊（約4.3億港元）。




歐洲金童獎由意大利《都靈體育報》於○三年創辦，朗尼、美斯及法比加斯等球星都攞過，上屆得主係巴洛迪利，馬里奧葛斯今次當選，為德甲爭一口氣，成為第一位効力德甲球會嘅球員攞呢個獎，亦係第一位德國人獲此殊榮。


曼聯加入爭奪


馬里奧葛斯多咗呢個「金漆招牌」，身價續漲，早前有傳阿仙奴準備用3000萬鎊收購佢，依家更引起曼聯注意，想用5000萬鎊打包馬里奧葛斯同蘇保迪，前者佔3500萬鎊，如果馬里奧葛斯繼續有好表現，相信身價會再上升。