紅魔煲「和」味魚生粥

猪拉多纳

10/12/2011
文： 朱楓

受傷嘅獅子永遠最可怕！雖然日前喺歐聯出局，但曼聯一向最叻喺逆境中反彈，今晚返番英超主場對狼隊，朱楓覺得紅魔至少可以煲魚生粥，「讓球和」有3.85倍有得諗！（有線200及300、廣東體育周六晚11:00直播）




曼聯日前喺歐聯倒灶以1:2不敵巴素利出局，無奈降格轉戰歐霸盃，令全世界球迷大跌眼鏡，不過見慣大場面嘅費格遜賽後唔算太失望，反而激勵班球員，希望全隊都可以化悲傷為動力，盡早克服傷痛，變得更加強壯。


尼曼查維迪提早收咧


事實上，「紅魔鬼」不嬲都擅長喺逆境中反彈，遠嘅唔講，之前曼市打吡錄得史上最大慘敗後，立即痛定思痛打出一個5連勝。雖然曼聯官網尋日正式公布隊長尼曼查維迪因膝傷提早收咧，今季餘下賽事唔使預佢，嚟緊日子或會改用近期頻頻孭鑊嘅莊尼伊雲斯，夥拍表現跌Watt嘅里奧費迪南鎮守中路，但畢竟今仗對手只係狼隊，後防面臨考驗唔算太大，何況前鋒朗尼啱啱獲歐洲足協減刑沖喜，可以喺歐國盃分組賽最後一戰復出，心情靚靚，今晚隨時嚟料，成為帶領曼聯走出谷底嘅英雄都未定！


狼隊作客腳軟5連敗


對家狼隊上仗絕地反擊，落後一球下，最後主場2:1反勝新特蘭，大大紓緩降班壓力，不過今晚作客曼聯，相信好難再搶到分，事關佢哋今季作客奇曳，自揭幕戰作客贏布力般流浪後，之後聯賽作客未嘗一勝，已累積5連敗，最近6次作客曼聯亦錄得全敗，不過當中有4場只係僅以輸1球，既然有迹可尋，今晚再追又何妨？


橫數千軍


曼聯旺開1:0




‧近4場英超勝仗愛煲魚生粥，均贏1:0。

‧近6次交手5勝1負，有4場僅勝1球。

狼隊客勝率僅得14%

‧聯賽作客1勝1和5負，勝率僅14%。

‧近8場2勝1和5負，連續7場開大。