多蒙特大咗先講

猪拉多纳

06/12/2011
文： 麥馬拿仁

歐聯F組賽事，多蒙特主場對馬賽，「蜜蜂兵團」想出線的話，要入四粒先有價講，肯定攻足全場，一於捧大！（有線62及202台周三凌晨3時45分直播）




此組出線形勢微妙，阿仙奴已肯定首名出線，其餘三隊都仲有機會晉級。馬賽現積七分，奧林比亞高斯六分，多蒙特四分，如今仗多軍贏波、奧軍輸波，多蒙特就同馬賽同分，由於馬賽主場贏多蒙特三比○，所以多蒙特今次要贏番三比○先可以追平對賽成績，可惜「蜜蜂兵團」得失球又差過馬賽，換言之要贏到四比○或以上先掂。如奧軍和波、三軍同積七分的話，多蒙特更要贏到五球，先可憑分組賽中總入球數字較多而晉級。當然，如果奧軍贏波，多蒙特贏馬賽十比○都冇用。


馬賽隨時都要搏贏


事實上，多蒙特現時幾乎只剩數字上出線機會，但球隊難得入到歐聯，肯定會搏到最後，而且佢哋一向主攻，依家目標明確，肯定一開波就撻行副偈喪攻，馬里奧葛斯、羅拔利雲度夫斯基同香川真司都弗，每個都有機會數胡。馬賽方面，現時出線形勢好似唔曳，但如果阿仙奴放生奧林比亞高斯，馬賽就要贏波，相信佢哋作客都唔會坐以待斃，今仗戰情必定緊湊，大有機會上演入球騷！