紅軍強勢富咸冇得剩

猪拉多纳

05/12/2011
文： 朱楓

啱啱殺入聯賽盃4強嘅利物浦，今晚回師英超作客富咸，雖然盧卡斯養傷，不過紅軍勝在兵源充足，近排又頻頻喺勁旅身上攞到甜頭，信心爆晒燈，對住鋒力弱到喊嘅富咸，要贏波根本冇難度，2倍客W值博！（有線200及300、廣東體育周二凌晨4:00直播）




利物浦今季表現全面回勇，近排仲愈踢愈醒，主場逼和爭標大熱曼城不特止，又兩度作客擊敗勁旅車路士，走勢勁過火車，依家班兵嘅狀態同信心都處於巔峰，難得咁好勢頭，今晚作客富咸，紅軍又點會打窒自己道氣玩留力先？




富咸鋒力弱到喊




係，「突然升呢」嘅盧卡斯上仗對車仔一役勇戰受傷，好大機會提早收咧，謝拉特亦繼續倦勤，中場係少咗兩件，不過紅軍大把貨，查理阿當、史比寧、佐敦軒達臣件件都有料到，日前仲回收埋今季喺黑池大放光芒嘅舒維爾，咁多選擇，要搵個嚟頂替盧卡斯嘅空缺絕對唔難，咪忘記杜格利殊手上仲有麥斯洛迪古斯同比拿美兩隻「奇牌」，一落場就有機會改寫戰局，整體戰鬥力根本P:贏富咸幾條街。




同利物浦相反，富咸近排愈踢愈沉，連埋日前歐霸盃作客不敵川迪，已累積4場不勝，入嗰2球波仲要係對手擺老烏。鬼咩，安祖莊臣同森莫亞表現時好時壞，迪比利同拜仁雷斯係有腳法，可惜門前把握力超曳，賽前英國傳媒仲話左翼杜夫今仗可能因小腿受傷缺陣，睇埋富咸上季主場輸畀利物浦2:5嘅往績，今鋪真係唔多樂觀。