懷斯倒戈紅軍「招呼」比拿美

猪拉多纳

05/12/2011


今季重返英超的富咸左閘懷斯，將首次倒戈利物浦，佢同比拿美一對冤家必成焦點。四年前兩人一齊効力紅軍時，比拿美曾以高爾夫球棍襲擊懷斯，但懷斯話二人當時好快就握手言和，彼此從無芥蒂，早前熱身賽挪威對威爾斯，雙方碰面仲老友鬼鬼，以當年「棍擊事件」互相取笑添！


高球桿事件當笑話


○七年利物浦歐聯作客巴塞隆拿前夕，「惡漢」比拿美同懷斯發生衝突，前者仲郁手郁腳，用高爾夫球棍襲擊隊友。不過事件冇影響利物浦發揮，兩位當事人更在魯營各入一粒助球隊贏波，比拿美入波後以揮桿動作慶祝。




今晚二人正面交鋒，懷斯話同比拿美係好朋友：「當時我哋好快就握手言和，冇影響過彼此感情，早前國家隊賽事碰頭，我哋仲重提嗰件事，大家都唔知玩得幾開心！利物浦今季免費簽入比拿美，肯定係其中一單最佳收購。」提到利物浦，懷斯非常懷念：「○一至○八年効力紅軍時係我事業高峰，加盟富咸前我有幻想過回歸晏菲路，但現時我只得一個目標，就係助富咸擊敗利物浦。」