富咸大餐舔利

猪拉多纳

05/12/2011
文： 樂比堅尼

香港時間周二凌晨英超獨腳戲，富咸主場對利物浦。富咸連踢三場作客，返到主場自然渴望贏波，而紅軍狀態回勇，兩軍今場都唔會甘心失分，呢種氣氛同心態，有利兩隊大踢進攻足球，樂比仔建議捧大盤。（有線200及300台周二凌晨4時直播）




富咸嘅卡雲農舍球場同觀眾席距離甚近，除咗有比賽氣氛，亦帶動到球員情緒，節奏通常非常明快，睇番富咸今季十二場主場賽事，除對維拉冇波入外，其餘十一場都有士哥，近五次全部開大盤，淨係睇呢個數據已值得投大盤信心一票，加上富咸領隊祖爾一向係進攻足球支持者，今仗主場出擊一定唔會手軟。


利物浦作客多波入


利物浦近期狀態相當好，已保持七仗不敗，當中包括兩勝車路士，前線蘇亞雷斯、古積特、麥斯洛迪古斯甚至比拿美都相當弗，而且紅軍有個特性，就係作客表現更勝主場，已連贏六場作客，每場起碼入兩粒，可見利物浦作客攻力完全唔成問題。




此外，利物浦中場盧卡斯因傷提早收咧，領隊杜格利殊話會重用小將史比寧，冇咗盧卡斯喺中場掃蕩，紅軍防守力肯定有所削弱，隨時畀富咸鋒將有機可乘。




睇番兩軍對賽成績，其實亦相當旺大盤，上季利物浦作客卡雲農舍球場就大勝五比二，而前季富咸主場則贏三比一，今場兩隊隨時又大手交易。