馬拉加超班皇蘇有難

猪拉多纳

04/12/2011
文： Yennie

西甲冠軍9成9係皇馬、巴塞之爭，季前大事擴軍嘅馬拉加，睇嚟最多只能為來屆歐聯資格努力。呢支「西甲曼城」今晚會造訪弱旅皇家蘇斯達，以佢哋嘅質素，要贏波應該唔難，博2.2倍客勝。（now632台周日晚11:00直播）




馬拉加前年夏天得到卡塔爾超級富豪入主，經過一年交接期，今夏就進行大事擴軍買人，依家班波可謂粒粒皆星，絕對孭得起「西甲曼城」呢個稱號。家陣大軍陣容包括有荷蘭射手雲尼斯達萊、西班牙國腳中場辛迪卡索拉、祖亞昆，仲有法國球星杜拿蘭等，實力當然唔嘢小。




皇蘇殘陣近8戰輸5仗




牌面幾勁都好，都要有戰績支持嘅，馬拉加開咧至今13戰7勝2和4負，目前排喺西甲第5，落後「一哥」皇馬9分，相比起第3、4位嘅華倫西亞同利雲特，更只係4分同3分嘅差距，見得吓人架。以佢哋嘅實力，想攞來屆歐聯入場券當然唔算貪心。當然，佢哋今仗會有守將捷西斯加美斯同杜拿蘭缺陣，但面對住弱旅皇蘇，以佢哋近4戰3勝1和嘅氣勢，想攞3分嘅阻力唔會太大。




對家皇蘇近8戰輸足5場，佢哋目前以13戰得12分排尾4，只係得失球好過希杭少少先唔使跌落降班區。最慘呢班波嘅入球來源只得西班牙前鋒阿基列斯，踢法略嫌單調，今仗仲有中場重心皮亞圖、伊拿拉文迪同守將卡達梅路因傷缺陣，殘陣兼實力不及對手，好難唔輸喎！


微博傳情 \(^O^)/


前日係我生日，又大一歲喇！好感激爸爸媽媽咁多年嚟對我嘅包容同照顧！依家輪到我照顧番你哋喇！我嘅生日願望係希望畢業後搵份好工，為達成目標努力！今年嘅生日過得好開心，好多謝同學仔餐生日飯，特別係幕後功臣Ken，多謝Jamie嘅窩心禮物，仲有兩個好姊妹Alison同嘉曦，同我度過一個開心嘅生日前夕。當然，要多謝一位好有料、唱歌彈琴踢波瓣瓣掂嘅球星好友陪我度過生日。哈哈，你的確係「冇得輸」！係呀，早排應朋友婚紗店老闆娘邀請拍咗輯靚相，嚟緊月中會喺婚紗展登場，依家畀大家先睹為快，記住繼續支持我呀！

Yennie心水 馬拉加（勝）

半隻腳踩咗入靚模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。