祖記強陣炒塞開餐

猪拉多纳

04/12/2011
文： 力奇

重拾勁旅本色嘅祖雲達斯，周中憑住無比鬥志喺拿玻里手上搶番1分，力保今季不敗金身，今晚佢哋返回主場迎戰弱旅切塞納，有「小王子」馬治斯奧及時復出頂替停賽嘅派路發辦，實力依然強大，而且返番自己地頭踢番擅長嘅「433」陣式，真係唔難食「塞」咁食，1.7倍「讓球主勝」抵玩。（開賽時間：周日晚10:00）




祖記上場作客拿玻里一早知道唔易打，最慘係球隊骨幹重心馬治斯奧停賽，主帥干地自然不敢怠慢，由慣常「442」同「433」陣式之間，決定改打「352」出戰，雖然話新陣可以增加中場截擊力，可惜由於球員對新陣默契不足，結果先後曾落後0:2同1:3，最後追得番3:3真係執身彩啦！


上場大難不死保金身


干地唔係蠢人，今次返主場出擊，當然會用番慣常「433」陣式，最緊要係馬治斯奧復出頂替派路，隊波進攻節奏必定大幅提高，加埋上仗大難不死，成功保住開季12場不敗佳績，球員信心大增，要大捷趕過番AC攞番榜首位又有幾難？




切塞納呢支意甲下游隊伍，上月辭退主帥基安普路，換嚟新帥阿里戈尼，果然表現有起色，近排仲取得3連勝添！不過，力奇要提提大家，切塞納呢3連勝贏嘅對手只係中下游嘅熱拿亞同博洛尼亞，以及喺意盃砌低低組別嘅古比奧，根本同祖記冇得比。


切塞納梅度倒戈起晒底


再睇埋佢哋5次作客祖記只得1勝4負，唯一勝仗係因為半場落後嗰陣，有祖記主場球迷搞事導致腰斬，場波只係判畀佢哋贏，擺明畀祖記恰死。仲有，切塞納射手梅度今仗倒戈，有幾多料祖記點會唔知吖？加上中場施卡利同門將拉華基亞都要停賽，殘陣出擊，輸2、3球都好正路。


橫數千軍


祖記近戰旺開大

‧聯賽主場4勝2和，入14球失5球。

‧近8戰5勝3和，對上6仗5場開大。

切塞納交手不勝

‧近8戰3勝2和3負，有7場開細。

‧近5次交手未嘗一勝，得2和3負。