漢堡恃勇主場拆紐

猪拉多纳

04/12/2011
文： 蘇斯黑柴

德甲周日頭場漢堡主場鬥紐倫堡，漢堡季初搞到一鑊泡，但自新帥芬克上任後明顯大有改進，今仗賽前備戰積極，無論正副選球員都搶晒韁，相反客軍紐倫堡質庸態沉兼陣容不整，作客去到恩達球場擺明等劏，漢堡1.75倍主Ｗ係重心推介，進取啲可以捧埋有3倍嘅「讓球主勝」。（有線61及204台周日晚10時30分直播）




漢堡新帥芬克喺瑞士超巴素利教出彩虹，嚟到漢堡之後的確落足心機，喺陣容穩定性、提升狀態同士氣都見成效，佢上任至今五戰保持不敗，上次主場以二比○輕取賀芬咸，取得主場首捷後士氣大振，上周末聯賽作客賽和漢諾威後，仲安排咗場甚有分量嘅熱身賽，喺上周二主場以二比一擊敗蘇超班霸格拉斯哥流浪，該役只有馬素贊臣等少數主力落場，但一班副選好似查洛林、文切尼、林志堅、孫弘民同伊利斯域都踢到搶晒韁，後兩者仲取得入球，雖然箭頭柏歷仍然養傷，但芬克睇見一眾副選都咁弗同咁落力，都話今仗點兵有魚與熊掌之感。


紐倫堡質庸近況差


位處德國南部嘅紐倫堡，近季北伐對漢堡多數冇運行，近四季兩和四負未贏過，佢哋實力平庸，今季季初演出尚算唔差，只可惜阿根廷籍後防大將賓路拿受傷後，成績急劇下滑，近六場聯賽只得四分，作客仲四連敗；防線痛失大將，前線又欠缺具分量取分人物，作客面對當起嘅漢堡凶多吉少。