拜仁反彈靠不來梅

猪拉多纳

03/12/2011
文： 走肖

拜仁慕尼黑今晚喺德甲主場對雲達不來梅，講明會安排日前操練受傷嘅射手馬里奧高美斯打正選，對家不來梅有門神韋爾斯父親過世唔能夠候命，正所謂球場如戰場，相信「超級馬里奧」唔會感情用事手軟，有條件帶挈球隊開「讓球主勝」。（有線61及64周六晚10:30直播）


馬里奧高美斯帶傷搏殺


今季連盃賽攻入21球嘅馬里奧高美斯，練波受傷嚇親唔少拜仁球迷，不過德國傳媒話佢呢場可以照樣上陣，要知道拜仁喺聯賽2連敗，主席路明尼加落咗柯打要贏波，目標係聖誕前重登榜首，就算拜仁有中場舒韋恩史迪加同泰摩斯卓克分別養傷、停賽，依然信得過。




另一方面，不來梅門將韋爾斯父親剛啱去世，為免佢心情低落影響表現，教練舒哈夫決定唔使佢隨隊，弊在代替佢把關嘅美亞列斯，今季聯賽4次上陣未試過保持清白，勁失7球，加上前鋒阿拿奧杜域、後衞保尼斯治同施維斯達未好番，咁嘅情況遇到拜仁，只能夠嘆句唔好彩。