曼聯 8強爆水晶宮

猪拉多纳

30/11/2011
文： 樂比堅尼

今晚英格蘭聯賽盃八強戰，曼聯主場對水晶宮，呢個戲碼對老一輩嘅球迷相信有唔少回憶，十六年前「奧脫福大帝」簡東拿就係向水晶宮球迷起飛腳。但時移世易，今仗已變成雞肋賽事，曼聯暗示再派小將出戰，以紅魔小將上兩圈大炒對手嘅表現，相信仍足以輕取英冠球隊水晶宮，捧「讓球主勝」及大盤。（now 638周四凌晨3時45分直播）


曼聯近況略為回落，近兩仗主場先後被賓菲加及紐卡素逼和，不過英冠嘅水晶宮同以上兩隊級數完全唔同，即使曼聯今仗唔會夫添出戰，但樂比仔相信佢哋仍可以質取勝，省靚番個招牌！


睇番曼聯對上兩圈嘅晉級過程，作客分別大勝列斯聯同埋艾迪索特三比○，今仗主場出戰相信更有把握。


「紅魔」領隊費格遜賽前雖然冇透露會出邊位球員，但佢暗示達施華兄弟、基斯史摩寧及新星保羅普巴都有機會上陣。大家千祈唔好低估呢班小將，曼聯對上兩圈都係靠佢哋晉級，而且表現不比班師兄遜色！

水晶宮5仗不勝冇入波

水晶宮早前表現唔錯，但近期卻陷入低潮，除五場不勝外，更一球都入唔到，可以話差到非常得人驚。水晶宮極其量只係英冠中游貨色，如睇番曼聯上次對英冠上游嘅列斯聯都贏得咁輕鬆，相信今仗主場對水晶宮可輕鬆過關！

猪拉多纳

11/30