車仔曼城有餐開

猪拉多纳

29/11/2011
文： 樂比堅尼

今晚英聯盃八強上演Big5廝殺，車路士主場對利物浦及阿仙奴主場對曼城。英聯盃一向被稱為雞肋，食之無味棄之可惜，不過依家嚟到八強階段，冇理由唔食埋佢，當中最有本錢「食雞」嘅係車仔領隊保亞斯及曼城領隊文仙尼，事關兩支富貴兵團人腳最充裕，二線兵一樣星光熠熠，樂比仔捧「雙藍軍」！




車路士主場對利物浦，兩軍九日前先碰過頭，當時樂比仔捧利物浦，但今次掉轉槍頭揀番車仔，因為紅軍剛惡鬥完曼城，隔兩日又踢硬仗，備受壓力嘅車路士領隊保亞斯係時候帶兵復仇喇！（now 638周三凌晨3時45分直播）


杜格利殊講明收主力


杜格利殊已講明會收起部分主力，如果真係要靠史比寧、馬田基利及高亞迪斯等新仔打江山，樂比仔一定捧車仔。




車仔後備席全部都係貴價貨，「小魔獸」盧卡古、天才橫溢嘅麥伊治蘭，預計今仗都會擔大旗，其餘所謂嘅後備好似沙洛文卡勞、安歷卡、保辛華及阿歷士洛里高都係星級球員，加上林柏特上場對狼隊都冇正選，如果今場有埋「林伯」，車仔咁都唔贏真係冇嘢好講。




記得當年莫連奴首季入主車仔，都係擊敗利物浦捧走英聯盃先聲奪人，保亞斯作為「莫連奴二世」，走嘅路咁相似，隨時一樣靠呢個盃仔發圍！