馬拉加炸散黃色潛艇

猪拉多纳

28/11/2011
文： 朱楓

倒戈戰喺球場上屢見不鮮，今晚西甲維拉利爾作客造訪馬拉加，就要面對帶過「黃色潛艇」登上高峰嘅比歷連尼同舊將辛迪卡索拉，對於今非昔比嘅客軍嚟講，心酸之餘更加係一場噩夢。馬拉加開季主場除不敵皇馬外悉數奏捷，讓半一上盤又點可以唔捧？（now632台及廣東體育周二凌晨4:00直播）




馬拉加教頭比歷連尼喺2004至05球季起執教維拉利爾達5季，並曾領軍殺入06年歐聯4強、更喺07至08年球季歷史性取得聯賽亞軍，可以話係維拉利爾黃金年代嘅締造者。比歷連尼上季中轉教富豪球會馬拉加，今季開始交出成績，憑主場佳績暫列西甲第5，歐聯席位絕非遙不可及，可見呢位教頭功力深厚，中場伊斯高亦好興奮咁話：「我哋今季要一步一步咁向住歐洲賽資格進發！」


維拉利爾傷兵問題嚴重


除咗教練比歷連尼之外，馬拉加中場辛迪卡索拉亦會倒戈，佢今季轉會後交足貨，暫入4球成為首席射手，賽前佢亦為舊東家嘅劣績開脫：「佢哋有太多球員受傷，所以開季賽績唔係咁好，但係之後一定會進步。」雖然舊將都幫母會講好說話，可惜維拉利爾不復當年勇已係不爭事實，先係歐聯5戰皆北出局，更受嚴重傷患困擾，主力射手基奧斯比羅斯及尼爾馬均告受傷，搞到聯賽作客冇贏過之餘更只得1個入球。




維拉利爾如果延續頹勢，莫講話要爭取來屆歐洲賽入場券，仲隨時捲入降班漩渦，右閘安祖盧比斯更未踢都認低威：「馬拉加係個強勁對手，我哋依家缺乏嘅正係呢份可以擊敗強敵嘅信心。」連落場嘅都冇信心，睇怕「黃色潛艇」今仗都難逃一劫喇！