馬賽雪藏射手破「門」乏力

猪拉多纳

27/11/2011
文： 走肖

馬賽今晚喺法甲主場對巴黎聖日耳門，讓平半要唔過，事關射手基格納日前喺歐聯得罪教練迪甘斯，搞到入雪櫃被掟落預備組，加上近排火力下降好容易出事，對家聖日耳門據聞即將落實簽入「萬人迷」碧咸，梗係要省靚招牌恭候佢加盟啦！（now631台周一凌晨4:00直播）


基格納同迪甘斯無偈傾


08至09年球季成為法甲神射手嘅基格納，今季上陣時間大減，正因為咁，日前谷到爆嘅佢終於同教頭迪甘斯吵大鑊，前幾日操練，兩個人甚至連偈都唔傾，結果基格納被掟落預備組作懲罰，之不過馬賽近4場有3場冇波入，基格納睇唔過眼發惡絕非冇道理，唔知迪甘斯今仗諗住搵邊個扭轉形勢呢？


聖日耳門加快步伐簽碧咸


呢邊馬賽殘局有待收拾，聖日耳門就加快步伐搶簽碧咸，總監李安納度更加用「進入倒數」形容碧咸加盟勢在必行，又諗住1月簽埋國際米蘭射手迪亞高米列圖，目標直指聯賽冠軍，撞啱聖日耳門上星期被南錫打斷12場聯賽不敗走勢，呢個時候冇理由想再衰畀人睇，梗係要贏波保住個榜首位置。




更微妙係，最近車廠雪鐵龍分別同馬賽、聖日耳門簽訂咗一份4年贊助合約，仲為呢場波推出特別版雪鐵龍DS3造勢，從陰謀論睇，今場和氣收場機會較大，畢竟贊助商唔會希望聖日耳門失分影響爭標，何況佢哋仲打算搵前車路士領隊安察洛堤同希丁克領軍，為免成為清洗對象，班球員當然會更加搏命，希望踢好波留個好印象畀未來教頭睇。