拜仁搵緬恩斯追數

猪拉多纳

27/11/2011
文： 蘇斯黑柴

黑柴向來唔算電影迷，平均一個禮拜睇唔到一套片，而且吓吓慢人幾拍，皆因一定要有眾多好友推介至會睇，近期印象最深刻嘅必然係印度大片《3 Idiots》，香港片名《作死不離三兄弟》，內地譯名叫《三個傻瓜》。




「3 Idiots」片長三粒鐘，控訴僵化教育，有笑有淚，但最精彩嘅係戲中對白同金句，「All is well！」（一切安好！）同「Chase Excellence，Success will follow！」（追求卓越，成就就會找上你！）既富教育性又富娛樂性，黑柴愛到暈。




重提呢套有啲過時嘅電影，原因係今日講拜仁，拜仁多年來都出晒名有「三個傻瓜」，現任名譽會長碧根鮑華、管理局主席漢尼斯，加埋執行主席路明尼加，三人經常排排坐喺觀眾席睇波，愛隊心切，咬牙切齒拍手歡呼，動作表情多多，只可惜佢哋只擅理財，拜仁盤數靚絕歐洲，但講到管理足球就係門外漢，令黑柴又愛又恨，上季就因為信錯「偽名帥」尹戈爾搞到三大皆空。




「拜仁三傻」向來笑料百出，釐定收購開支預算成日計錯，又不時以不同口徑干預教練工作，雖然到咗今日，碧根鮑華已經逐漸淡出，由副執行主席賀夫拿名正言順頂上佢個位，不過好在佢哋已經吸取教訓，逐漸將權力下放畀實幹型嘅體育主管拿寧加，今季又請番經驗同功力都一流嘅軒歷基斯第三度執教，球隊成績好，佢哋亦樂得做觀眾。


緬恩斯弱勢弱陣等劏


拜仁今晚作客鬥緬恩斯（有線61及201台周一凌晨零時30分直播），基於上輪主場輸咗畀多蒙特，榜首優勢所餘無幾，加上歐聯提早首名出線十六強，無後顧之憂下可以盡情追數；緬恩斯今季星散，已由黑馬淪為護級分子，聯賽主場七戰五負，今仗仲有幾名中後場主力洛維斯基、波蘭斯基同馬素懷斯缺陣，面對拜仁係「螳臂當車」，推介1.88倍「讓球客勝」。