士砵亭食住個勢做贏「加」

猪拉多纳

26/11/2011
文： 力奇

葡超聯賽今晚上演重量級里斯本打吡，由賓菲加主場火併士砵亭。賓菲加今仗有隊長安達臣雷沙奧缺陣，要頂住士砵亭嘅流暢進攻已經唔易，仲話學人讓波？我梗係撐1.97倍嘅士砵亭「讓球客勝」啦！（開賽時間：周日凌晨4:15）




葡超嘅三雄鼎立局面，近10年8載已經冇乜見過，事關士砵亭自02年奪標後就一沉不起，近2季仲衰到落後冠軍近30分，認真羞家。好彩，士砵亭今夏換咗新會長，又搵帶過布拉加攞亞軍殺入歐霸決賽嘅42歲少帥杜明高斯揸旗，成績即時起飛，依家葡超打咗10輪，士砵亭就以23分排第3，僅以1分之差落後波圖同賓菲加。


賓菲加隊長打柴


士砵亭大翻身，最大功臣當然係荷蘭射手雲禾夫斯雲高啦，佢門前把握力真係超勁，今季已經入咗11球，連曼聯同車仔都話睇中佢；佢嘅進攻拍檔仲有舒赫斯、迪亞高卡普同法比安連拿奧度，踢法悅目，絕對唔可以睇小。




對家賓菲加啱啱攞到歐聯出線資格，可惜隊長中堅安達臣雷沙奧喺上仗受傷，今戰唔使預佢，防線冇咗呢位大將，都咪話唔擇使。最弊係佢哋嘅前鋒殺手奧斯華度加坦都未必踢得，個陣咁殘，點讓得起來勢洶洶嘅士砵亭呀?