私房菜送上門 紅魔慢火炆鵲

猪拉多纳

26/11/2011
文： 樂比堅尼

今晚英超重頭戲，曼聯主場對「喜鵲」紐卡素。「紅魔鬼」經過季初狂風掃落葉式贏波後，近期進入調整期，狀態略為低沉，但作為一支班霸，曼聯最可怕地方就係踢得差照贏你，從對上三場聯賽曼聯表現一般，最終仍可以一比○作結，就知道曼聯厲害，今場仲要對住私房菜紐卡素，想唔贏都難，主W冇肉食，建議吼3.55倍「讓球和」。




（有線300及200台周六晚11時直播）




曼聯季初聯賽五連勝，合共射入二十一球，當時朗尼入波當食生菜，但正所謂凡事太盡，緣分定必早盡，曼聯近期表現回落，雖然整體嚟講都係成日贏，但從盤路計，已經連續四場輸盤，再睇遠啲，近十二場僅三場贏盤，即係不足三成！你話恐唔恐怖！


冇晒季初強大火力


曼聯回落，某程度上同傷兵多有關，進攻主力朗尼、韋碧克及艾舒利楊格早前都先後受傷，即使後兩者已復出，但感覺上同受傷前比較始終冇咁Sharp醒。雖然朗尼今場可候命披甲，但由於曼聯周中歐聯對賓菲加都花咗唔少氣力，所以樂比仔預期曼聯今場會踢得好辛苦，就算贏都會贏得好驚險。


冷敲3.55倍「讓球和」


紐卡素長期畀曼聯食住，近六次作客奧脫福僅得一和五負，其中四次仲要捧蛋而回，雖然紐卡素目前排第四，仲要踢到上輪先被曼城破不敗之身，不過呢啲神奇球隊道氣洩咗，好多時都踢唔番未輸前嘅水準，樂比仔睇好曼聯今場小勝對手，3.55倍「讓球和」揀得過。