希丁克等上車撥火 保亞斯唔信賠錢炒佢

猪拉多纳

23/11/2011

保亞斯為車仔創下「阿布時代」最差開局後陷水深火熱，盛傳油王搵緊下任教頭之餘，前領隊兼大熱人選希丁克更出言撥火！不過保亞斯仍然定過抬油，堅決唔信阿布會賠錢炒人。

炒魷阿布要畀2.5億

車路士喺保亞斯帶領下慘成「垃圾車」，開季至今12戰輸4場，成為阿布拉莫域自2003年入主車仔以嚟最差開局。近日盛傳阿布有意請希丁克回巢，希丁克接受俄羅斯電視台訪問時更擺明挑戰保亞斯：「我喺車路士一直相當受歡迎，同阿布嘅關係亦非常好。我會先休息一陣，不過對教波仍然充滿幹勁。」


面對希丁克嘅威脅，保亞斯就寸爆指：「希丁克曾經對車仔好重要，不過得6個月咁大把。」另外佢又死撐：「阿布唔會賠一大筆錢掟我走囉！」英國《太陽報》指，阿布要炒保亞斯就要賠2,000萬鎊（約2.5億港元），不過呢位油王入主以嚟已經使咗6,900萬鎊（約8.4億港元）炒6位領隊，只得希丁克成功做到約滿，保亞斯唔好咁淡定好喎！