蜜蜂兵團轉虧為盈袋1億

猪拉多纳

23/11/2011

「蜜蜂兵團」多蒙特同阿仙奴可謂「孿生兄弟」，兩隊今季走勢同樣先跌後升，而且都係重用小將。多蒙特日前公布上季業績轉虧為盈，純利有950萬歐元（約1億港元），比另一支德甲勁旅拜仁慕尼黑多八倍。

踢埋歐聯「錢」景樂觀

「蜜蜂兵團」上季雖然冇份踢歐聯，但球會理財有道，收入達到1.51億歐元（約16億港元），比前季增加三成，並成功轉虧為盈，由前季稅後蝕280萬歐元，到上季賺950萬歐元。多蒙特上季表現出色，門票銷售、電視轉播費及贊助費等收入都有上升，其中電視轉播收入更達到3210萬歐元，僅次於拜仁。多蒙特一個月前獲得Puma為期八年總值5000萬歐元球衣贊助，加上今季有得踢歐聯，估計業績將會進一步暴漲。


另外，有傳阿仙奴高層已親自同多蒙特高層會面，提出收購馬里奧葛斯，估計呢位德國新星身價達3000萬鎊（約3.7億港元），如果成事，多蒙特又可以大賺一筆。