車仔靠古遜唔過

猪拉多纳

23/11/2011
文： 樂比堅尼

香港時間周四凌晨上演歐聯E組榜首大戰，利華古遜主場對車路士。車仔接連敗陣，球員已陷入信心危機，加上防線經常送大禮，今仗面對由波歷克率領嘅利華古遜，隨時有失分危機點讓波？樂比仔建議捧「讓球主勝」！（有線62及202台周四凌晨3時45分直播）


車路士自上月尾不敵昆士柏流浪便開始交上惡運，近六仗法定時間僅贏一仗，仲要係魚生粥僅熟小勝當時英超榜尾布力般流浪。近日已有傳領隊保亞斯帥位不穩，雖然樂比仔相信保亞斯唔會咁快被炒，但再咁落去，冇人知道班主阿布拉莫域嘅底線定喺邊度。

和波收貨讓唔起利華

究竟車仔依家出現咗乜問題？首先防線極度不穩，中堅大衞雷斯質高卻輕出，間中會犯嚴重錯誤，猶如計時炸彈；隊長泰利明顯走下坡，連艾殊利高爾、施治兩位出晒名嘅穩定先生，今季都輪流出現狼狽情況，僅得伊雲洛域可長期保持佳態。


其次係進攻失去重心，以往車仔進攻體系好明顯，就係集中喺林柏特同杜奧巴身上，其他只係輔助角色，但自從引入費蘭度托利斯、魯爾梅利斯及桑馬達後，邊個係主邊個係副角色變得模糊。


利華古遜唔算係歐洲頂級球隊，但德甲球隊近年喺歐洲賽嘅表現確實有信心保證，加上佢哋中場有波歷克呢位老大哥壓陣，佢對舊會車路士踢法非常熟悉，相信會畀到隊友重要情報。車仔今場拎一分都可企穩榜首，作客踢法未必會咁進取，和波一啲都唔奇，讓唔起利華古遜。

車仔近兩季 歐聯作客成績

球季 戰果

11/12 1:1亨克

1:1華倫西亞

10/11 1:2曼聯

2:0哥本哈根

0:1馬賽

2:0莫斯科斯巴達

4:1勝斯利納