巴林日本U23攻「細」唔慌多

猪拉多纳

22/11/2011
文： 九叔

日本U23今日响奧運外圍賽亞洲區C組賽事，作客麥納瑪挑戰巴林U23，可能面對風沙、雷雨嘅困擾，想清風送爽輕鬆贏波好難，1.78倍入球細反而值得一博。（now 671台周二晚10:30直播）


小組首戰數咗馬來西亞兩蛋嘅日本U23，同敍利亞並列C組榜首，只係淨得球少對方1球，如果想鋪平日後嘅出線道路，今場波許和不許敗，所以佢哋做足備戰工夫，上星期五就去咗多哈集訓，前日轉抵麥納瑪立刻去適應場地，仲因應巴林社會動盪，下達咗宵禁令，閒時唔准四圍去，一切都要集體行動。

外流兵得大津祐樹奉召

不過，日本U23今次唔算強陣，清武弘嗣、原口元氣都選擇幫大國腳踢世盃外圍賽，放棄玩奧運外圍賽，流通經濟大學個中場山村和也又斷腳做手術，前鋒山崎亮平就帶傷隨軍。徵召歐洲外流球員咩？宮市亮有傷，拜仁唔放宇佐美貴史，結果得慕遜加柏個大津祐樹肯返歸，主帥關塚隆惟有用扇原貴宏頂清武個位，做死球負責人，雖則話效果都唔錯，但始終比唔上清武咁老練。


比較起嚟，人腳都唔算最大問題，事關巴林係就係同利物浦一樣有個叫「紅軍」嘅花朵，講真水準就差天共地嘞，C組首戰作客敍利亞輸1:3，就知佢哋有幾多料。之不過，巴林有樣煞食嘅就係天氣同地利，根據當地天文台預測，今日可能出現風沙，同埋多雲偶有雷雨，呢一點對採用小組地面推進嘅日本U23極度不利，隨時搞到兩隊波打亂章，咁嘅環境博吓入球細算嘞。